ప్రపంచవ్యాప్తంగా మరోసారి ఎబోలా వైరస్ కలకలం రేపుతోంది. ముఖ్యంగా ఆఫ్రికా దేశాల్లో కేసులు పెరుగుతున్న నేపథ్యంలో భారత ప్రభుత్వం అప్రమత్తమైంది. ఇటీవల ఆఫ్రికా నుంచి భారత్కు వచ్చిన ఇద్దరు ప్రయాణికుల్లో ఎబోలా లక్షణాలు కనిపించడంతో దేశవ్యాప్తంగా ఆరోగ్య శాఖలు హై అలర్ట్ ప్రకటించాయి. అయితే ఇప్పటివరకు దేశంలో ఒక్క ఎబోలా పాజిటివ్ కేసు కూడా నిర్ధారణ కాలేదని కేంద్ర ఆరోగ్య శాఖ స్పష్టం చేసింది.
బెంగళూరులోని కెంపెగౌడ అంతర్జాతీయ విమానాశ్రయంలో ఉగాండా నుంచి వచ్చిన 28 ఏళ్ల మహిళలో ప్రాథమిక ఎబోలా లక్షణాలు కనిపించాయి. విమానాశ్రయంలో నిర్వహించిన థర్మల్ స్క్రీనింగ్లో ఆమెకు జ్వరం, ఒంటి నొప్పులు ఉన్నట్లు వైద్య బృందాలు గుర్తించాయి. వెంటనే ఆమెను ప్రత్యేక అంబులెన్స్ ద్వారా ప్రభుత్వ ఆసుపత్రిలోని ఐసోలేషన్ వార్డుకు తరలించారు. ఆమె నుంచి సేకరించిన నమూనాలను పుణేలోని నేషనల్ ఇన్స్టిట్యూట్ ఆఫ్ వైరాలజీ (NIV) ల్యాబ్కు పరీక్షల కోసం పంపించారు. మరో రెండు రోజుల్లో ఫలితాలు వెలువడే అవకాశం ఉంది.
కర్ణాటక ఆరోగ్య శాఖ అధికారులు ప్రజలు ఆందోళన చెందాల్సిన అవసరం లేదని స్పష్టం చేస్తున్నారు. కేవలం జ్వరం లేదా శారీరక బలహీనత కనిపించిందని మాత్రమే ఎబోలా నిర్ధారణ చేయలేమని, అన్ని జాగ్రత్తలు తీసుకుంటున్నామని తెలిపారు. ప్రస్తుతం ఆ మహిళ ఆరోగ్యం స్థిరంగానే ఉందని అధికారులు వెల్లడించారు.
ఇక ఆంధ్రప్రదేశ్ ప్రభుత్వం కూడా అప్రమత్తమైంది. విజయవాడ అంతర్జాతీయ విమానాశ్రయంలో ప్రత్యేక ఎబోలా స్క్రీనింగ్ కేంద్రాన్ని ఏర్పాటు చేశారు. విదేశాల నుంచి, ముఖ్యంగా ఆఫ్రికా లేదా సింగపూర్ మార్గం ద్వారా వచ్చే ప్రయాణికులను థర్మల్ స్కానింగ్, ఆరోగ్య పరీక్షల ద్వారా పరిశీలిస్తున్నారు.
విజయవాడ ప్రభుత్వ ఆసుపత్రి (జీజీహెచ్)లో ప్రత్యేక ఎబోలా వార్డును సిద్ధం చేశారు. ఆక్సిజన్, వెంటిలేటర్ సదుపాయాలతో 6 నుంచి 8 పడకల ఐసోలేషన్ విభాగాన్ని ఏర్పాటు చేసినట్లు ఆసుపత్రి అధికారులు తెలిపారు. వైద్యులు, పారామెడికల్ సిబ్బందికి ప్రత్యేక శిక్షణ కూడా ఇస్తున్నారు. ఇప్పటివరకు ఏపీలో ఎబోలా కేసులు లేవని అధికారులు స్పష్టం చేశారు.
ఈ నేపథ్యంలో రష్యా నుంచి వచ్చిన వార్త ప్రపంచానికి కొంత ఊరటనిస్తోంది. ప్రాణాంతకమైన ‘బుండిబుగ్యో ఎబోలా’ స్ట్రెయిన్ను ఎదుర్కొనే కొత్త వ్యాక్సిన్ను విజయవంతంగా అభివృద్ధి చేసినట్లు రష్యా ఆరోగ్య శాఖ ప్రకటించింది. ఈ వ్యాక్సిన్పై ఇప్పటికే సానుకూల ఫలితాలు వచ్చినట్లు సమాచారం. టీకా పూర్తిస్థాయిలో అందుబాటులోకి వస్తే ఆఫ్రికా సహా అనేక దేశాలకు ఇది పెద్ద ఊరటనివ్వొచ్చని నిపుణులు భావిస్తున్నారు.
ప్రపంచ ఆరోగ్య సంస్థ (WHO) సూచనల ప్రకారం ఎబోలా వైరస్ అత్యంత ప్రమాదకరమైన వ్యాధుల్లో ఒకటి. ఈ వైరస్ సోకినవారిలో ఆకస్మిక జ్వరం, తీవ్రమైన బలహీనత, కండరాల నొప్పులు, వాంతులు, విరేచనాలు, రక్తస్రావం వంటి లక్షణాలు కనిపిస్తాయి. ఈ లక్షణాలు ఉన్నవారు వెంటనే వైద్యులను సంప్రదించి ఐసోలేషన్లో ఉండాలని ఆరోగ్య అధికారులు సూచిస్తున్నారు.
ఎబోలా వైరస్ ప్రధానంగా బాధితుల శరీర ద్రవాల ద్వారా వ్యాపిస్తుంది. అందువల్ల వైద్య సిబ్బంది ప్రత్యేక పీపీఈ కిట్లు, మాస్కులు ఉపయోగిస్తూ జాగ్రత్తలు తీసుకుంటున్నారు. విమానాశ్రయాల్లో కూడా ప్రయాణికులపై నిఘా పెంచారు.
ప్రస్తుతం భారత్లో ఎలాంటి ప్రమాద పరిస్థితి లేదని కేంద్ర ప్రభుత్వం స్పష్టం చేసినప్పటికీ, అంతర్జాతీయ ప్రయాణాల నేపథ్యంలో ముందస్తు జాగ్రత్తలు కొనసాగుతున్నాయి. ప్రజలు అపోహలు నమ్మకుండా, అధికారిక సమాచారం మాత్రమే విశ్వసించాలని ఆరోగ్య నిపుణులు సూచిస్తున్నారు.
India Strongly Rejects China-Pakistan Remarks on Jammu & Kashmir, Calls References ‘Illegal’
About the Author
