బైరెడ్డి సిద్ధార్థ రెడ్డికి షాక్.. కేసు నమోదు చేసిన మంత్రి టీజీ భరత్

కర్నూలు జిల్లాలో రాజకీయ వాతావరణం ఒక్కసారిగా వేడెక్కింది. వైసీపీ నేత బైరెడ్డి సిద్ధార్థ రెడ్డి, మంత్రి టీజీ భరత్ మధ్య మాటల యుద్ధం ఇప్పుడు లీగల్ ఫైట్‌గా మారింది. ఇటీవల బైరెడ్డి చేసిన వివాదాస్పద వ్యాఖ్యలపై మంత్రి టీజీ భరత్ పోలీసులను ఆశ్రయించడంతో, కర్నూలు త్రీ టౌన్ పోలీసులు బైరెడ్డి సిద్ధార్థ రెడ్డిపై పలు బీఎన్‌ఎస్ సెక్షన్ల కింద కేసు నమోదు చేశారు. ఈ పరిణామం జిల్లా రాజకీయాల్లో సంచలనంగా మారింది.

మే 14న కర్నూలు కలెక్టరేట్ ఎదుట వైసీపీ నిర్వహించిన భారీ ధర్నాలో బైరెడ్డి సిద్ధార్థ రెడ్డి పాల్గొన్నారు. ఈ సందర్భంగా ఆయన అధికార పక్షాన్ని, ముఖ్యంగా మంత్రి టీజీ భరత్‌ను తీవ్ర స్థాయిలో విమర్శించారు. తనపై విమర్శలు చేసే వారిని ప్రోత్సహిస్తున్నారని, రాజకీయంగా లక్ష్యంగా చేసుకుంటున్నారని ఆరోపించారు. “నాకు టికెట్ రాలేదని మంత్రి మాట్లాడుతున్నారు.. కానీ ఎమ్మెల్యే కావాలనే ఆశ మీకే ఎక్కువగా కనిపిస్తోంది” అంటూ బైరెడ్డి వ్యాఖ్యానించారు.

ఇదే కాకుండా, ఇటీవల ఆత్మహత్య చేసుకున్న సతీష్ కుటుంబానికి సంబంధించిన అంశాన్ని కూడా ప్రస్తావిస్తూ బైరెడ్డి సంచలన ఆరోపణలు చేశారు. ఏ ఫార్మా కంపెనీ నుంచి ఆ కుటుంబానికి డబ్బులు వచ్చాయో చెప్పడానికి తాను సిద్ధమని, కానీ నిజాలు బయటకు వస్తే వాటిని ఖండింపజేస్తారని అన్నారు. ఈ వ్యాఖ్యలు రాజకీయంగా పెద్ద చర్చకు దారితీశాయి.

అలాగే టీజీ వెంకటేష్ కుటుంబాన్ని ఉద్దేశించి కూడా బైరెడ్డి పరోక్ష వ్యాఖ్యలు చేయడం వివాదాన్ని మరింత పెంచింది. “మీసాలు తిప్పుకుని తిరిగేవాళ్లు ఇప్పుడు మీసాలు దించుకుని ఎవరి దగ్గరకు వచ్చారో చెప్పాలి” అంటూ వ్యాఖ్యానించారు. ప్రశ్నించిన వారిపై తప్పుడు కేసులు పెడుతున్నారని ఆరోపించారు. ఈ కామెంట్లు అధికార పార్టీ నేతల్లో తీవ్ర ఆగ్రహాన్ని రేపాయి.

ఈ నేపథ్యంలో మంత్రి టీజీ భరత్ కర్నూలు త్రీ టౌన్ పోలీస్ స్టేషన్‌లో ఫిర్యాదు చేశారు. బైరెడ్డి చేసిన వ్యాఖ్యలు పూర్తిగా అసత్యమని, తనతో పాటు తన కుటుంబ గౌరవాన్ని దెబ్బతీయడానికి ఉద్దేశపూర్వకంగా మాట్లాడారని ఆరోపించారు. ప్రజల్లో ద్వేషభావన సృష్టించేలా మాట్లాడటం వల్ల తన ప్రతిష్ట దెబ్బతిందని ఫిర్యాదులో పేర్కొన్నారు.

మంత్రి ఫిర్యాదు మేరకు పోలీసులు బైరెడ్డి సిద్ధార్థ రెడ్డిపై 351(2), 352, 353(2), 356(1), 356(2) బీఎన్‌ఎస్ సెక్షన్ల కింద కేసు నమోదు చేశారు. ప్రస్తుతం ఈ వ్యవహారం రాష్ట్ర రాజకీయాల్లో హాట్ టాపిక్‌గా మారింది. వైసీపీ నేతలపై ప్రభుత్వం కక్షసాధింపు చర్యలకు దిగుతోందని ప్రతిపక్ష నేతలు విమర్శిస్తుండగా, నిరాధార ఆరోపణలు చేస్తే చట్టపరమైన చర్యలు తప్పవని అధికార పార్టీ నేతలు చెబుతున్నారు.

ఇక మంత్రి టీజీ భరత్ ఇక్కడితో ఆగేది లేదని స్పష్టం చేశారు. ఇప్పటికే క్రిమినల్ పరువునష్టం కేసు పెట్టిన ఆయన, త్వరలోనే సివిల్ పరువునష్టం దావా కూడా వేయనున్నట్లు తెలిపారు. చట్టపరంగా పూర్తిస్థాయిలో పోరాటం చేస్తానని వెల్లడించారు.

రాయలసీమ రాజకీయాల్లో బైరెడ్డి సిద్ధార్థ రెడ్డి, టీజీ భరత్ ఇద్దరూ యువ నాయకులుగా గుర్తింపు పొందారు. వీరి మధ్య ప్రారంభమైన ఈ రాజకీయ, న్యాయపరమైన పోరు భవిష్యత్తులో మరింత ఉత్కంఠకు దారితీసే అవకాశాలు కనిపిస్తున్నాయి. ప్రస్తుతం కర్నూలు జిల్లా రాజకీయాల్లో ఇదే ప్రధాన చర్చగా మారింది.