డయాబెటిక్ ఫుట్ సమస్యతో బాధపడుతున్న వారికి ఇప్పుడు కొత్త ఆశ కనిపిస్తోంది. హైదరాబాద్లోని అపోలో ఆస్పత్రి దేశంలో తొలిసారిగా ‘సెరామెంట్ జి’ అనే అత్యాధునిక ఎముక పునరుత్పత్తి విధానాన్ని అందుబాటులోకి తీసుకొచ్చింది.
ఈ ‘సెరామెంట్ జి’ అనేది స్వీడన్కు చెందిన BoneSupport అభివృద్ధి చేసిన సిరామిక్ ఆధారిత సొల్యూషన్. ఎముక దెబ్బతిన్న లేదా తొలగించిన ప్రాంతంలో దీన్ని ఇంజెక్ట్ చేయడం ద్వారా కొత్త ఎముక పెరుగుదలకు సహాయపడుతుంది.
ఈ సొల్యూషన్లో ఉన్న జెంటామైసిన్ అనే యాంటీబయాటిక్ నేరుగా ఇన్ఫెక్షన్ ఉన్న ప్రాంతంలో పనిచేసి, సంక్రమణను వేగంగా నియంత్రిస్తుంది. దీంతో ఎముక ఇన్ఫెక్షన్లు తీవ్రమవకుండా అడ్డుకోవచ్చు.
మధుమేహంతో బాధపడేవారిలో రక్తనాళాలు, నరాలు దెబ్బతినడం వల్ల పాదాల్లో స్పర్శ తగ్గిపోతుంది. చిన్న గాయాలు కూడా గుర్తించకుండా ఉండటం, రక్తప్రసరణ తగ్గిపోవడం వల్ల గాయాలు మానకపోవడం జరుగుతుంది. ఇది చివరికి తీవ్రమైన ఇన్ఫెక్షన్కు దారితీసి, కొన్ని సందర్భాల్లో కాళ్ల భాగాలను తొలగించాల్సిన పరిస్థితి (అమ్ప్యుటేషన్) వస్తుంది.
ఇలాంటి క్లిష్ట పరిస్థితుల్లో ‘సెరామెంట్ జి’ ఎంతో ఉపయోగకరంగా పనిచేస్తుంది. ఇన్ఫెక్షన్ను నియంత్రించడమే కాకుండా, కొత్త ఎముక పెరిగేలా చేయడం దీని ప్రత్యేకత.
ఈ టెక్నాలజీపై ప్రత్యేక శిక్షణ కార్యక్రమాన్ని నిర్వహించగా, వేణు కవర్తపు నేతృత్వంలో వర్క్షాప్లు, లైవ్ సర్జరీలు నిర్వహించారు. అలాగే, ఈ చికిత్సతో ఒకే దశలో సమస్యను పరిష్కరించవచ్చని నిపుణులు చెబుతున్నారు.
విదేశాల్లో ఇప్పటికే విజయవంతంగా వినియోగంలో ఉన్న ఈ విధానం ఇప్పుడు భారతదేశంలో అందుబాటులోకి రావడం వైద్య రంగంలో ఒక కీలక ముందడుగు అని నిపుణులు అభిప్రాయపడుతున్నారు. దీని ద్వారా అమ్ప్యుటేషన్ల సంఖ్య తగ్గే అవకాశం ఉందని, రోగులు త్వరగా కోలుకునే అవకాశం ఉంటుందని వైద్యులు తెలిపారు.
About the Author
