టీడీపీకి రెండు, బీజేపీ-జనసేనకు చెరో సీటు.. రాజ్యసభ రేసులో ఎవరెవరు?

దేశవ్యాప్తంగా జరగనున్న రాజ్యసభ ద్వైవార్షిక ఎన్నికలకు కేంద్ర ఎన్నికల సంఘం షెడ్యూల్ విడుదల చేసింది. ఈసారి ఆంధ్రప్రదేశ్‌తో పాటు పలు రాష్ట్రాల్లో ఖాళీ అవుతున్న 24 రాజ్యసభ స్థానాలకు ఎన్నికలు నిర్వహించనున్నారు. జూన్ 1న ఎన్నికల నోటిఫికేషన్ విడుదల కానుండగా, అవసరమైన రాష్ట్రాల్లో జూన్ 18న పోలింగ్ నిర్వహించేందుకు ఎన్నికల సంఘం ఏర్పాట్లు చేస్తోంది. ఈ షెడ్యూల్ విడుదలతో రాజకీయ పార్టీల్లో అభ్యర్థుల ఎంపికపై చర్చలు వేగం పుంజుకున్నాయి.

ఆంధ్రప్రదేశ్‌లో ప్రస్తుతం నాలుగు రాజ్యసభ స్థానాలు ఖాళీ కానున్నాయి. ప్రస్తుతం సభ్యులుగా ఉన్న పిల్లి సుభాష్ చంద్రబోస్, ఆళ్ల అయోధ్యరామిరెడ్డి, పరిమళ్ నత్వానీ, సానా సతీష్‌ల పదవీకాలం ముగియనుండటంతో కొత్త సభ్యుల ఎన్నిక అనివార్యమైంది. రాష్ట్రంలో అధికార కూటమిగా కొనసాగుతున్న టీడీపీ, జనసేన, బీజేపీ ఈ నాలుగు స్థానాల పంపకాలపై ఇప్పటికే ప్రాథమిక అంగీకారానికి వచ్చినట్లు రాజకీయ వర్గాల్లో ప్రచారం జరుగుతోంది.

సమాచారం ప్రకారం నాలుగు స్థానాల్లో రెండు స్థానాలు తెలుగుదేశం పార్టీకి, ఒక్కో స్థానం జనసేన మరియు బీజేపీకి కేటాయించే అవకాశాలు కనిపిస్తున్నాయి. అధికారిక ప్రకటన ఇంకా వెలువడకపోయినా, మూడు పార్టీల మధ్య ఈ అంశంపై సానుకూల చర్చలు పూర్తయ్యాయని తెలుస్తోంది. దీంతో ఇప్పుడు ప్రధానంగా అభ్యర్థుల ఎంపికపై ఆసక్తికర చర్చ సాగుతోంది.

టీడీపీ తరఫున రాజ్యసభకు పోటీ చేసే అభ్యర్థుల విషయంలో సామాజిక సమీకరణాలకు ప్రాధాన్యం ఇవ్వనున్నట్లు సమాచారం. ప్రస్తుతం రాజ్యసభ సభ్యుడిగా ఉన్న సానా సతీష్‌కు మరోసారి అవకాశం కల్పించే అవకాశం ఉందని పార్టీ వర్గాలు చెబుతున్నాయి. అలాగే బీసీ, ఎస్సీ లేదా మైనారిటీ వర్గాలకు ప్రాతినిధ్యం కల్పించే దిశగా పార్టీ నాయకత్వం ఆలోచిస్తున్నట్లు తెలుస్తోంది.

టీడీపీ నుంచి ఆశావహుల జాబితాలో భాష్యం విద్యాసంస్థల అధినేత భాష్యం రామకృష్ణ పేరు ప్రముఖంగా వినిపిస్తోంది. అలాగే ఎస్సీ వర్గానికి అవకాశం కల్పిస్తే సీనియర్ నాయకుడు వర్ల రామయ్య పేరు కూడా పరిశీలనలో ఉండొచ్చని రాజకీయ విశ్లేషకులు భావిస్తున్నారు. మరోవైపు మైనారిటీ కోటాలో అవకాశం కల్పించాలని నిర్ణయిస్తే ప్రభుత్వ మైనారిటీ వ్యవహారాల సలహాదారు ఎం.ఏ. షరీఫ్ పేరు ముందువరుసలో ఉన్నట్లు సమాచారం.

ఇక బీసీ వర్గానికి ప్రాధాన్యం ఇస్తే సీనియర్ నాయకుడు యనమల రామకృష్ణుడు పేరు కూడా బలంగా వినిపిస్తోంది. పార్టీలో సుదీర్ఘ అనుభవం, ప్రభుత్వ వ్యవహారాలపై పట్టు ఉన్న నాయకుడిగా ఆయనకు రాజ్యసభ అవకాశం దక్కే అవకాశం ఉందని రాజకీయ వర్గాలు అంచనా వేస్తున్నాయి.

జనసేన పార్టీ విషయానికి వస్తే, ఇప్పటి వరకు పారిశ్రామికవేత్త లింగమనేని రమేష్ పేరు ప్రధానంగా వినిపించింది. అయితే తాజాగా మరో ఇద్దరు ప్రముఖులు కూడా రేసులోకి వచ్చినట్లు సమాచారం. వారిలో పారిశ్రామికవేత్త బండారు నరసింహరావు పేరు చర్చకు వస్తుండగా, తెలుగు సినీ పరిశ్రమకు చెందిన ప్రముఖ నిర్మాత పేరు కూడా పరిశీలనలో ఉన్నట్లు రాజకీయ వర్గాల్లో చర్చ సాగుతోంది. దీంతో జనసేన అభ్యర్థి ఎంపికపై ఆసక్తి మరింత పెరిగింది.

బీజేపీ విషయానికి వస్తే, తమిళనాడుకు చెందిన ప్రముఖ నేత అన్నామలై పేరు బలంగా వినిపిస్తోంది. పార్టీ అధిష్టానం ఇప్పటికే ఈ అంశంపై కూటమి నేతలకు సంకేతాలు ఇచ్చినట్లు ప్రచారం జరుగుతోంది. దక్షిణ భారత రాజకీయాల్లో బీజేపీ బలోపేతానికి అన్నామలై కీలక నాయకుడిగా భావిస్తున్న నేపథ్యంలో ఆయనకు రాజ్యసభ అవకాశం దక్కవచ్చని అంచనాలు వ్యక్తమవుతున్నాయి.

అయితే ఈ పేర్లన్నీ ప్రస్తుతం రాజకీయ వర్గాల్లో జరుగుతున్న చర్చల ఆధారంగా మాత్రమే వినిపిస్తున్నాయి. అధికారికంగా ఏ పార్టీ కూడా తమ అభ్యర్థులను ప్రకటించలేదు. షెడ్యూల్ విడుదలైన నేపథ్యంలో వచ్చే వారం కూటమి పార్టీల ముఖ్య నేతలు సమావేశమై తుది నిర్ణయం తీసుకునే అవకాశాలు ఉన్నాయి.

రాజ్యసభ ఎన్నికలు సాధారణంగా జాతీయ రాజకీయాలకు మాత్రమే పరిమితం కాకుండా రాష్ట్ర రాజకీయ సమీకరణాలపై కూడా ప్రభావం చూపుతాయి. అందుకే ఈసారి ఆంధ్రప్రదేశ్‌లో అధికార కూటమి ఎలాంటి సామాజిక, రాజకీయ సమీకరణాలతో అభ్యర్థులను ఎంపిక చేస్తుందనేది ఆసక్తికరంగా మారింది. వచ్చే కొన్ని రోజుల్లో అభ్యర్థుల ప్రకటనతో ఈ ఉత్కంఠకు తెరపడనుంది.