ఆంధ్రప్రదేశ్లో మత్స్యకారుల సంక్షేమం కోసం అమలు చేస్తున్న ‘మత్స్యకారుల సేవలో’ పథకం మరోసారి చర్చనీయాంశమైంది. ఈ పథకం కింద ప్రభుత్వం రెండో విడత ఆర్థిక సాయం విడుదల చేయడంతో ఉమ్మడి కృష్ణా జిల్లాకు చెందిన మత్స్యకారులు తమ ఆనందాన్ని వినూత్నంగా వ్యక్తం చేశారు. కృష్ణానదిలో వందలాది పడవలతో ప్రయాణిస్తూ సీఎం చంద్రబాబు నాయుడు, మంత్రి నారా లోకేశ్, కూటమి ప్రభుత్వానికి ప్రత్యేక కృతజ్ఞతలు తెలిపారు.
వేట నిషేధ సమయంలో జీవనోపాధి దెబ్బతినకుండా మత్స్యకారులకు భరోసా కల్పించాలనే ఉద్దేశంతో ప్రభుత్వం ఈ పథకాన్ని అమలు చేస్తోంది. ఈ పథకం కింద అర్హులైన ప్రతి మత్స్యకారుడి ఖాతాలో రూ.20 వేల ఆర్థిక సహాయం జమ చేస్తున్నారు. గత ఏడాది ప్రారంభమైన ఈ కార్యక్రమాన్ని ఈసారి కూడా కొనసాగించడంతో మత్స్యకారుల్లో ఆనందం వ్యక్తమైంది.
ఈ సందర్భంగా వెంకటపాలెం, తుమ్మలపాలెం, సీతానగరం, కుమ్మరపాలెం ప్రాంతాలకు చెందిన మత్స్యకారులు భారీ సంఖ్యలో పడవలతో కృష్ణానదిలో ప్రయాణిస్తూ సీఎం నివాసం వైపు వెళ్లారు. వందకు పైగా బోట్లతో చేసిన ఈ ప్రత్యేక ర్యాలీ స్థానికంగా ఆకట్టుకుంది. నదిమీద నుంచి ప్రభుత్వానికి కృతజ్ఞతలు తెలియజేయడం అరుదైన సంఘటనగా మారింది.
మత్స్యకారుల ఈ ప్రేమాభిమానాలను గమనించిన మంత్రి నారా లోకేశ్ వారిని తన నివాసానికి ఆహ్వానించారు. ఇంటి వద్దకు వచ్చిన మత్స్యకారులతో లోకేశ్ ఆత్మీయంగా మాట్లాడారు. వారి సమస్యలు, జీవన పరిస్థితుల గురించి అడిగి తెలుసుకున్నారు. మత్స్యకారుల కష్టసుఖాల్లో ప్రభుత్వం ఎప్పుడూ అండగా ఉంటుందని హామీ ఇచ్చారు.
ఈ సందర్భంగా లోకేశ్ మాట్లాడుతూ, యువగళం పాదయాత్ర సమయంలో మత్స్యకారుల ఐకమత్యాన్ని దగ్గరగా చూశానని గుర్తుచేశారు. గ్రామాలను శుభ్రపరిచి, రంగురంగుల ముగ్గులతో తనకు స్వాగతం పలికిన తీరు ఇప్పటికీ గుర్తుందని అన్నారు. ఒకసారి నిర్ణయం తీసుకుంటే దానిపై నిలబడే గుణం మత్స్యకారుల్లో ఎక్కువగా ఉంటుందని ప్రశంసించారు.
అలాగే గత ప్రభుత్వ పాలనలో రాష్ట్రం తీవ్ర నష్టాన్ని చవిచూసిందని, ఇప్పుడు రాష్ట్ర పునర్నిర్మాణంతో పాటు ప్రజా సంక్షేమంపై కూడా ప్రభుత్వం దృష్టి పెట్టిందని లోకేశ్ తెలిపారు. యువతకు మెరుగైన ఉద్యోగ అవకాశాలు కల్పించేందుకు ప్రపంచవ్యాప్తంగా కంపెనీలను రాష్ట్రానికి తీసుకువస్తున్నామని చెప్పారు.
మత్స్యకారుల పిల్లలు మంచి విద్యను అభ్యసించి ఉన్నత స్థాయికి చేరుకోవాలని ప్రభుత్వం కోరుకుంటోందని ఆయన అన్నారు. ఇందులో భాగంగా జువ్వలదిన్నెలో డిఫెన్స్ కంపెనీకి శంకుస్థాపన చేసినట్లు పేర్కొన్నారు. అలాగే తమిళనాడు జాలర్లు అక్రమంగా ప్రవేశించకుండా సర్వేలెన్స్ కోసం ఆధునిక అటానమస్ పెట్రోలింగ్ బోట్లను ఏర్పాటు చేయనున్నట్లు వివరించారు.
మత్స్యకారులకు ఎలాంటి సమస్య వచ్చినా తమ ఇంటి తలుపులు ఎప్పుడూ తెరిచే ఉంటాయని లోకేశ్ భరోసా ఇచ్చారు. ఇంట్లో కూర్చోబెట్టి అందరితో ఫోటోలు దిగుతూ, ఆప్యాయంగా పలకరించారు. తమ కృతజ్ఞతలు చెప్పడానికి వచ్చిన తమకు మంత్రి ఇచ్చిన ఆదరణ మరువలేమని మత్స్యకారులు సంతోషం వ్యక్తం చేశారు.
ఈ ఘటనతో మత్స్యకారుల సేవలో పథకం మరోసారి ప్రజల్లో చర్చకు వచ్చింది. ప్రభుత్వం అందిస్తున్న సాయం తమ కుటుంబాలకు ఎంతో ఉపయోగపడుతోందని మత్స్యకారులు పేర్కొంటున్నారు.
About the Author
