ఆంధ్రప్రదేశ్లోని అనకాపల్లి జిల్లాలో అర్థరాత్రి స్వల్ప భూప్రకంపనలు సంభవించి ప్రజలను భయభ్రాంతులకు గురిచేశాయి. జిల్లాలోని అనకాపల్లి, ఎలమంచిలి, రాంబిల్లి ప్రాంతాల్లో ఈ ప్రకంపనలు నమోదు అయ్యాయి. రిక్టర్ స్కేల్పై భూకంప తీవ్రత 3.7గా నమోదైనట్లు సమాచారం. అర్థరాత్రి సుమారు 12:30 గంటల సమయంలో కొన్ని సెకన్ల పాటు భూమి కంపించడంతో నిద్రలో ఉన్న ప్రజలు ఒక్కసారిగా ఉలిక్కిపడ్డారు.
భూమి కంపించడంతో ఇళ్లలోని వస్తువులు స్వల్పంగా కదిలినట్లు స్థానికులు తెలిపారు. ఈ ఘటనతో భయాందోళనకు గురైన ప్రజలు వెంటనే ఇళ్ల నుంచి బయటకు పరుగులు తీశారు. కొంతమంది తమ అనుభవాలను సోషల్ మీడియాలో పంచుకుంటూ వాట్సాప్ స్టేటస్లుగా కూడా పోస్టులు పెట్టారు. కొన్ని సెకన్ల పాటు మాత్రమే ప్రకంపనలు కొనసాగినా, ఆ సమయంలో ఏర్పడిన భయం ప్రజల్లో ఆందోళన కలిగించింది.
అధికారుల సమాచారం ప్రకారం, ఈ భూకంపం భూమికి సుమారు 20 కిలోమీటర్ల లోతులో సంభవించినట్లు తెలుస్తోంది. భూప్రకంపనల కేంద్రం రాసపూడిపాలెం ప్రాంతానికి నైరుతి దిశలో సుమారు 50 కిలోమీటర్ల దూరంలో ఉన్నట్లు అంచనా వేస్తున్నారు. భూకంప తీవ్రత తక్కువగా ఉండటంతో ఎలాంటి ప్రాణనష్టం లేదా ఆస్తి నష్టం జరగలేదని అధికారులు తెలిపారు.
గతంలో కూడా విశాఖపట్నం, అనకాపల్లి ప్రాంతాల్లో ఇలాంటి స్వల్ప భూప్రకంపనలు సంభవించాయి. ముఖ్యంగా గత ఏడాది నవంబర్లో విశాఖపట్నం జిల్లాలో రిక్టర్ స్కేల్పై 3.7 తీవ్రతతో భూకంపం నమోదైంది. అప్పటికీ ప్రజలు భయంతో బయటకు వచ్చి రాత్రంతా అప్రమత్తంగా గడిపారు. ఇప్పుడు మళ్లీ ఇలాంటి సంఘటన జరగడంతో ప్రజల్లో ఆందోళన పెరిగింది.
ఇక గత రెండు సంవత్సరాలుగా ప్రకాశం జిల్లాలో కూడా భూప్రకంపనలు తరచుగా నమోదవుతున్నాయి. ముండ్లమూరు, తాళ్లూరు, దర్శి, కురిచేడు మండలాల్లోని పలు గ్రామాల్లో వరుసగా ప్రకంపనలు రావడం ప్రజలను భయపెడుతోంది. కొన్ని సందర్భాల్లో ఒకే రోజు పలుమార్లు ప్రకంపనలు నమోదయ్యాయి. పగటి సమయంలో కూడా ఈ కంపనలు రావడంతో ప్రజలు ఇళ్లు, కార్యాలయాలు, దుకాణాల నుంచి బయటకు పరుగులు తీశారు.
ఈ పరిణామాల నేపథ్యంలో అధికారులు అప్రమత్తమయ్యారు. భూప్రకంపనల కారణాలను తెలుసుకోవడానికి శాస్త్రవేత్తలతో సమావేశాలు నిర్వహిస్తున్నారు. హైదరాబాద్లోని ఎన్జీఆర్ఐ శాస్త్రవేత్తలు ఈ ప్రకంపనలపై అధ్యయనం చేస్తున్నారు. భూమి పొరల్లో ఏర్పడే చిన్న చిన్న గ్యాప్లు లేదా మార్పుల వల్ల ఇలాంటి స్వల్ప ప్రకంపనలు సంభవించే అవకాశముందని వారు తెలిపారు.
శాస్త్రవేత్తలు ప్రజలకు ఒక ముఖ్యమైన సూచన చేశారు. ఈ తరహా స్వల్ప భూప్రకంపనలు సాధారణమేనని, పెద్దగా భయపడాల్సిన అవసరం లేదని పేర్కొన్నారు. అయితే భూకంపాల సమయంలో జాగ్రత్తలు తీసుకోవడం మంచిదని సూచించారు. ప్రజల్లో అవగాహన పెంచేందుకు ప్రత్యేక కార్యక్రమాలు నిర్వహించాలని అధికారులకు సూచించారు.
About the Author
