ఆంధ్రప్రదేశ్లోని కడప జిల్లాలో ఓ బాలుడు చేసిన చర్య అందరినీ ఆశ్చర్యానికి గురిచేసింది. చిన్న గొడవ కారణంగా ఇంటి నుంచి వెళ్లిపోయిన అతడు, ఏకంగా 100 కిలోమీటర్లకు పైగా సైకిల్ తొక్కుకుంటూ వెళ్లడం సంచలనంగా మారింది.
ప్రొద్దుటూరుకు చెందిన ఓ కుటుంబంలో ఇద్దరు కుమారులు తరచూ గొడవపడుతుండేవారు. ఈ క్రమంలో తండ్రి వారిని మందలించడంతో, 9వ తరగతి చదువుతున్న బాలుడు తీవ్రంగా మనస్తాపానికి గురయ్యాడు. కోపంతో ఇంట్లో నుంచి బయటకు వెళ్లిపోయి, తన సైకిల్ తీసుకుని ప్రయాణం ప్రారంభించాడు.
రాత్రంతా ఎక్కడా ఆగకుండా రాజుపాలెం, చాగలమర్రి ప్రాంతాల మీదుగా సుమారు 100 కిలోమీటర్ల దూరం ప్రయాణించి నంద్యాలకు చేరుకున్నాడు. అలసటతో ఉన్నప్పటికీ, అక్కడ కూడా ఆగకుండా సైకిల్ను అమ్మేందుకు ప్రయత్నించాడు. దుకాణ యజమాని అనుమానం వ్యక్తం చేయడంతో, అక్కడి నుంచి వెళ్లిపోయి నంద్యాల రైల్వే స్టేషన్కి చేరుకున్నాడు.
అక్కడ తన సైకిల్ను వదిలి, వచ్చిన రైలులో ఎక్కి కర్ణాటకలోని రాయచూర్కు వెళ్లిపోయాడు. ఇదే సమయంలో, బాలుడు కనిపించడం లేదని తండ్రి పోలీసులకు ఫిర్యాదు చేశాడు. వెంటనే పోలీసులు కేసు నమోదు చేసి గాలింపు చర్యలు ప్రారంభించారు.
బాలుడి వద్ద ఫోన్ లేకపోవడంతో ట్రేస్ చేయడం కష్టమైంది. దీంతో పోలీసులు సీసీటీవీ కెమెరాల ఆధారంగా దర్యాప్తు చేపట్టారు. బ్యాగ్తో సైకిల్పై వెళ్తున్న బాలుడిని గుర్తించి, అతని ప్రయాణ మార్గాన్ని అనుసరించారు. నంద్యాల వరకు అతడు వెళ్లినట్లు గుర్తించి అక్కడ వెతకగా, రైల్వే స్టేషన్ సమీపంలో అతని సైకిల్ కనిపించింది.
ఆపై రైల్వే సిబ్బంది సహాయంతో అతడు రాయచూర్ వెళ్లినట్లు తెలుసుకుని, అక్కడికి వెళ్లి బాలుడిని సురక్షితంగా గుర్తించి తిరిగి ప్రొద్దుటూరుకు తీసుకొచ్చారు.
ఈ ఘటన చిన్న విషయాలపై కోపంతో తీసుకునే నిర్ణయాలు ఎంత ప్రమాదకరమో గుర్తు చేస్తోంది. తల్లిదండ్రులు పిల్లలతో స్నేహపూర్వకంగా మాట్లాడటం, పిల్లలు కూడా భావోద్వేగాలను నియంత్రించుకోవడం ఎంత ముఖ్యమో ఈ సంఘటన స్పష్టం చేస్తోంది.
About the Author
