రాయలసీమ సమగ్ర ఉద్యాన అభివృద్ధి కార్యక్రమంతో ప్రకాశం జిల్లా ఉద్యాన రంగానికి కూడా మేలు జరుగుతుందని సాంఘిక సంక్షేమ శాఖ మంత్రి డాక్టర్ డోలా శ్రీ బాల వీరాంజనేయ స్వామి తెలిపారు. రూ.1 లక్ష కోట్ల వ్యయంతో చేపట్టిన ఈ కార్యక్రమాన్ని కేంద్ర ఆర్థిక మంత్రి నిర్మలా సీతారామన్, ముఖ్యమంత్రి ఎన్. చంద్రబాబు నాయుడు, ఉప ముఖ్యమంత్రి కె. పవన్ కల్యాణ్ శుక్రవారం మదనపల్లెలో ప్రారంభించారు. అదే వేదికపై ఇండియన్ స్కూల్ ఆఫ్ అగ్రికల్చర్‌కు శంకుస్థాపన చేశారు.
ఒంగోలు నుంచి ప్రత్యక్ష ప్రసారం
ఒంగోలు కలెక్టరేట్‌లో మంత్రి స్వామి, కలెక్టర్ పి. రాజాబాబు, ఎంపీ మాగుంట శ్రీనివాసులు రెడ్డి, ఎమ్మెల్యే దామచర్ల జనార్దనరావు, ఒంగోలు పట్టణాభివృద్ధి సంస్థ చైర్మన్ షేక్ రియాజ్ తదితరులు శంకుస్థాపన కార్యక్రమాన్ని ప్రత్యక్ష ప్రసారంలో వీక్షించారు. అంతకుముందు మహాత్మా గాంధీ, లాల్ బహదూర్ శాస్త్రి చిత్రపటాలకు పుష్పాంజలి ఘటించారు.
మరో 27 వేల హెక్టార్లలో ఉద్యాన సాగు లక్ష్యం
ప్రస్తుతం ప్రకాశం జిల్లాలో 32,702 హెక్టార్లలో ఉద్యాన పంటలు సాగవుతున్నాయని, ఈ కార్యక్రమం కింద అదనంగా 27,156 హెక్టార్లను అభివృద్ధి చేయాలన్నది ప్రభుత్వ లక్ష్యమని మంత్రి వివరించారు. ఉమ్మడి ప్రకాశం జిల్లాలోని పది ఉద్యాన క్లస్టర్లు, 35 మండలాలు ఈ కార్యక్రమం ద్వారా లబ్ధి పొందుతాయని, ఇందుకు ప్రభుత్వం రూ.601 కోట్లు అందిస్తుందని ప్రకటించారు.
మిర్చి, మామిడి రైతులకు ప్రయోజనం
పంట రకాలు, నీటి సమర్థ వినియోగం, అధిక దిగుబడి, నాణ్యత పెంపు, కోత అనంతర నష్టాల తగ్గింపు, ప్రాసెసింగ్, విలువ జోడింపు, మార్కెటింగ్, రైతు ఉత్పత్తిదారుల సంఘాల బలోపేతంపై ఇండియన్ స్కూల్ ఆఫ్ అగ్రికల్చర్ దృష్టి సారిస్తుందని మంత్రి తెలిపారు.
మిర్చి సాగులో నాణ్యత, మంచి వ్యవసాయ పద్ధతులు, పురుగుమందుల అవశేషాల నియంత్రణ, ఉత్పత్తి ట్రేసబిలిటీ, ఎగుమతులకు అనుకూల విధానాలను ఈ ప్రణాళిక ప్రోత్సహిస్తుంది. మామిడి సహా ఇతర తోటల్లో ఆధునిక పర్యవేక్షణ, నాణ్యమైన ఉత్పత్తి, మార్కెట్ అనుసంధానానికి ప్రాధాన్యం ఇస్తారు.
సంబంధిత వార్త: మదనపల్లెలో గ్లోబల్ హార్టికల్చర్ హబ్‌కు శ్రీకారం.. ఇండియన్ స్కూల్ ఆఫ్ అగ్రికల్చర్‌కు పునాది
About the Author
